Neque enim id repente fortuito factum, verum coniuncta in hoc plurium aetatum hominumque studia reperimus. Quem enim Hymnum plerique prae laetitia novi ἑρμαίου tam similem Homero quam ovo ovum putabant, eum alii indignum vate, at antiquissimum et Homeridae alicuius fetum, Pindemontius haud priorem Alexandrinis, Ignarra centonem Moscoviticum vocabat, e Pausania et aliunde corrasis antiquis versibus infima aetate conglutinatum.